《小傳日記》大象低呀低，愈低愈溝稀；溝到成手貨，還是投降吧！
(經濟通)1月19日 星期一 17:26
《小傳日記》今晚（１９日）花旗假期休市，而明晚（２０日）就係美國
首位黑人總統奧巴馬
正式上任的日子。在觀望氣氛籠罩下，今朝香江亦乏表現，雖然早段一度衝上１３５００點之上，惟大戶壓實兩位大大隻佬，搞到個市仲一度倒跌添。恆指散場時漲８４點報１３３９９，成交縮水只有３７９億銀。
＊大象續被劏中移也受壓，缸邊甚飄忽唔做冇損失＊
大象（００００５）自被大行輪流唱淡後，表現每下愈況；英國
政府公布第二輪救市方案，隻象亦無厘反應，重要關卡一個接一個失守，真係傷透唔少「粉絲」個心。但查實若果同歐美錢莊比，大象近排表現已經算係有交代。只要睇番歐資巨型錢莊巴克萊上周五（１６日）單日就大撻逾兩成，而曾經係全球最大錢莊的花旗集團
上周累跌逾四成後，佢個Ｓｉｚｅ已經連小象（０００１１）都不如了，相對而言大象近排表現已經算係「跑贏」同儕。今日隻象曾低見６１﹒３銀，散場時撻３％，報６２﹒３銀。
隻象碌呀碌，小傳有個客由７０蚊邊一路一手兩手咁買入，買吓買吓已經儲到十隻手指都係貨，眼見隻象仍未止瀉，今日亦舉高雙手話投降。
＊地主推新盤股價各走各，兩電與一煤成避險寵兒＊
大象唔掂，小象亦繼續向後走，高開後倒跌１％。至於寶哥哥（０００２３）升勢有餘未盡，再漲逾１％。
除咗大象，中移（００９４１）亦成為淡友推倒對象，隻股今日在空軍狙擊下，先升後回，最終走低５仙。另邊廂，臨近長假期，唔少發展商有意加推新盤，但有缸友就擔心會引發搶客戰，未必對地主佬有利，地主佬今日各走各，超人（００００１）行前３％，大好友（０００８３）就由升轉跌，但在Ｕ盤時段又被顯著嘜高１３個價位，最終微升５仙，認真飄忽。
個市陰晴不定，兩電一煤再成寵兒，升幅約１％至２％。
＊Ａ仔小踏前國貨唔失禮，憧憬獲注資電力叉足電＊
今個禮拜係春節前最後一周，下周深滬魚缸將進入黃金周假期，喺長假期前，限售股解禁步伐未有停下來，初步計本周共有市值２０４億人仔大小非解禁，睇嚟「大小非」會繼續困擾深滬魚缸。深滬魚缸今日就輕微踢高，而國貨呢邊亦唔失禮，走前９８點報７２４６。
阿爺第二輪注資對象是誰呢？有傳國資委有意向五大電力集團及兩家電網公司，合共注資約１００億人仔，但據聞呢批注資金唔會直接注入上市企業。雖然話唔係直接注入，但今朝電力股已經即時撻著，大唐（００９９１）、華能（００９０２）及中國電力
（０２３８０）仍漲２％至半成。
花旗今晚假期休市，在假期前夕惹來補空倉盤帶動造好，油價遂反彈３％。雖然油價仍然缺乏基本回升條件，但突如其來的反彈已足以帶動中海油
（００８８３）走高２％。至於中石化（００３８６）旗下勝利油田產量創１０年新高，隻股亦母憑子貴，彈高４％有多。
＊大摩又發功內房齊軟跌，國航出盈警反而高高飛＊
大摩頭今日發表報告，睇淡首季內地磚頭表現，磚頭股普遍向淡，富力（０２７７７）同潤地（０１１０９）分別插水２％同４％；而雅居樂
（０３３８３）被項目合營股東終止協議並要求退還１２億人仔，隻股即撻近９％。
至於發「盈警」的國航（００７５３），因對沖合約錄得虧損，預計０８年度成績表將「見紅」，但隻股今朝就完全無受影響，仲重拾２蚊關添，散場時飛高６％有多。
處業績高峰期，「盈警」消息不絕於耳，北泰（０２３３９）亦為年度成績發「盈警」。原來北泰因為訴訟敗訴被凍結資產外，又學人炒Ｉ Ｋｉｌｌ Ｙｏｕ Ｌａｔｅｒ，斷估全年成績會大倒退。上述消息公布前後，多位高層更相繼「跳車」，隻股前景實在令人憂慮。今朝一開波就掛起免戰牌，但在停賽前錄一手Ｕ盤成交，挫逾兩成。
＊開卷果有益籌款助四川
，新春金多寶頭獎５５球＊
全球爆發金融海嘯，蒸發咗不知幾多銀兩。銀兩既然蒸發咗，不如做多啲善事。德國
佬連同小母牛合辦一個名為「小母牛－德意志銀行《開卷助人》計劃」，所籌得善款將支持小母牛嘅「四川地震災後重建」。
計劃目的喺鼓勵同學透過閱讀嚟捐助國內貧困農戶，幫助佢哋自力更生，參加同學喺農曆新年假期閱書，然後向親友募捐，方式可以每本書捐款計，又或者係捐一個總數，而德國佬同小母牛仲會一對一咁配對捐款，務求籌得更多善款。
小朋友讀得「書」多就更加醒目，贊助人同德國佬等就可捐多啲善款；做得善事多，投資亦自然得心應手啦！
八吓其他料，聽日六合彩開新春金多寶，有３８００萬金多寶，如果一注獨得頭獎，派成５５００萬，係歷嚟第二高嘅新春金多寶派彩，９：３０ｐｍ搞珠。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
