佢係陶言無忌
踏教院踏得好盡
教育學院舉行畢業禮，一班畢業生因為不滿特區政府遲遲未能將呢個教育學院升格為大學，一班學生竟然拒絕特首曾蔭權，以教育學院榮譽院長嘅身分主持嘅「扑頭」。即係曾蔭權揸住支嘢「扑」埋佢嘅時候，成班學生就借故閃開，以示教育學院未能成為大學。教育學院嘅畢業生將來係為人師表，咁樣嘅行為會唔會有教壞細路之嫌呢？教育學院是否一定要升格為大學呢？
喺外國有好多知名學府，絕對唔係叫做大學。例如著名嘅MIT，就係麻省理工學院，只要你嗰間學院夠實力、夠聲譽，同埋出好多猛人，你又何需一定要叫大學呢？仲有倫敦政治及經濟學院（LSE），亦都唔係大學，係叫做School喎，雖然佢拿嘅係倫敦大學學位。係倫敦仲有一間專出MBA，係國際嘅商界亦係極為知名嘅，就叫做LondonSchool ofBusiness——倫敦商學院。講到呢間商學院，就真係來頭猛喇，佢係僅次於哈佛MBA之外，或者係同哈佛MBA平起平坐嘅一間金融商界嘅貴族訓練場，嗱，呢啲都唔係叫做大學嘅。只要你自己有實力、有地位，教育學院出嚟嘅畢業生，如果係連英國嘅伊頓公學都爭住請嘅，你又何需斤斤計較，叫做大學呢？
仲有，前教育學院嘅院長張炳良，依家做咗行政會議嘅議員，咁假假哋，張炳良先生係咪應該要護住啊曾蔭權嘅聲譽同埋政策，而唔應該企埋係呢個民間在野嗰邊，喺到呐喊，話要將教育學院升格為大學，同曾蔭權對着幹，於是就搞到啲學生受到激勵，拒絕受曾蔭權「扑頭」祝福呢？
呢啲凡此種種跡象都顯示出特區政府嘅行政會議，一、毫無紀律，二、一盤散沙，比起董建華時代，實有過之而無不及。強政勵治，成個行政會議都散晒，搞到裏面一啲人吃裏就扒外，寧願喺出邊納民間嘅威信，都唔會同你曾蔭權同心同德，於是就搞出一班教育學院畢業生拒絕「扑頭」嘅事件喇。未來四年，曾蔭權又點樣行使佢嘅行政權威呢？
