大家好..講下我既背景先...
我今年20..我另一伴都係20...我地一齊左一年...(依家bb已經9個月啦~!!)上年10月知道自己有左bb 4個幾月..
其實我地8月頭都估到有左嫁啦...因為大家都係第一次有咁既情況..所以當時唔知點解決又唔敢同人講..
拖拖下..拖到10月先敢面對bb...我地都打算落左BB佢...但因為bb 4個幾月咁大落bb好危險...所以無落...
d社工就話生後可以給人領養...我另一伴話生得出就梗係想自己養啦...但我又驚沒有能力養...我另一伴份工又唔多
錢..佢又懶又成日遲到唔返工扣哂d錢..一個月5千都唔知有冇..我又岩岩讀完書...無做野..所以我好擔心養唔養起..但
我另一伴話佢會好努力返工搵錢唔再遲到喎...仲話會更加愛我就哂我錫哂我...我要咩都會買俾我..當時我仲好天真..所以好相信佢話既野!!!
但結果講一套做一套...好後悔相信佢...佢到依家都係好懶又成日遲到唔返工扣哂d錢..搞到個個月得5千都唔知有冇..搞到每個月都唔夠錢洗..多數係俾佢食哂同洗哂...(p.s我到依家都唔係同佢一齊住..已經唔係食佢既住佢既..)佢屋企人(有爸爸同妹妹)知道又唔理又唔幫..佢媽媽又走左佬..佢都係咩唔理..只係識訓訓訓..連註冊都無同我傾過囉..我屋企人都成日問我幾時註冊?邊個照顧bb?我同bb住邊?所以我屋企比左好多壓力我...好煩...我有左bb咁耐..佢就日日同我嘈交.講哂粗口((我最唔鍾意d人講粗口囉))有時面對面嘈的話.會用暴力對我...如果第時我同佢一齊住咪日日打架??我好唔鐘意佢牙..我已經唔愛佢..我真係好唔開心..差唔多日日都哭~佢都唔理..我忍受唔到啦...到依家我9個月啦~連買我入院既野同所有bb既野都無買過牙...我真係想放棄bb...我唔想同佢生bb...佢令我好憎恨個bb....

仲有好多事同問題..我都無打出來...
(我心裡仲好多野想講...但唔識打出來!!)

請盡快揾社工求助.....

妳現在情況及情緒, 最需要社工幫妳.. 你嘗試打去傾訴

媽媽的決擇
未婚懷孕服務   
電話: (852) 2868-2022
傳真: (852) 2537-7681
電郵: pgs@motherschoice.org

shirley妹妹唔好唔開心先...唔開心係幫唔到自己架...香港地有咁人..係咪最唔開心係你..我諗應該唔係...有好多野我係唔相信冇辦法解決..我知道你而家得20歲..年齡細唔緊要...最緊要識諗..如果你識諗..辦法應該解決到..我唔係講緊費話架..雖然我大過你...但我自己都有好多野煩亦唔開心..我成日同自己講..開開心心生個bb落黎先..你個bb都咁大啦...我真係唔想你唔要..我而家個bb都7個半月喇..你估我日日都咁如意咩..有冇喊過..我都有..我媽咪之前問我邊個湊bb..係邊度...幾時買樓..見一次問一次...你會覺得有壓力..但係..係第二個角度諗..佢都驚你冇人照顧遮..都係為你好..至於你男友唔理你..你咪唔好理佢囉..你有手大腳..係呢個香港地係唔會餓死架..仲有...如果你自己肯願意行出第一步..搵你住0個區社工..佢一定會幫到你..可能會有間平平地既公屋..因為我有個朋友仔佢都係咁...不過佢冇唔要個bb..其實我朋友仔同你而家諗既野一樣..到到而家佢好開心...自己冇簡錯條路...佢都係自己養大個bb..而家仲讀緊幼稚園添..所以..你識諗既話....冇男人係身邊都問題唔大..我地個個媽媽會支持你..記得..千祈唔好比你男友打..佢行度呢一步..唔好心軟即走...要做一個堅強既媽媽

你而家係唔可以唔要個BB, 如果你自己能夠做得到, 你可以選擇生出來,交比社會福利署, 呢D你可以同社工傾!! 你男朋友而家都可以動粗的話, 我真係唔咁想像以後會點!!

無論你自會作出一個咩決定都好, 你都要以呢一次,作一個反醒, 諗自己以後要點樣做!!!!!

傻瓜~*
唔要條佬都唔好唔要個b!!!
個b係你個肚度同你一齊行左9個月架,你唔開心佢知道的~!
唔洗好耐佢就會出世,除左家人之外,bb係你既至親了!!
我都係得20歲,,我個仔都2個幾月啦~
有時我同男友嗌交,我都會諗,第時如果大家唔可以再一齊,
我都會攬住個仔過世~話晒10月懷胎生架喎,唔係痾屎咁易架!!
即使將來遇唔到另一伴我都冇所謂囉~
經濟上既野,正如上面既媽咪講,搵社工傾下,佢地會諗個方法去幫你架~!
即使條路幾難行,bb都會陪住你,bb就係你既勇氣~!

我陀bb果陣都同當時ge另1半發生左唔少事,令到我好唔開心,亦有好似你咁想放棄,覺得個bb累左自己...  但當然最後無放棄(已經放棄唔到..)

但我好好彩,,有家人朋友ge支持,離開左果個男人之後,唔開心左1排,但好快企返起身,個人清醒左,而且比之前開心左...

到而家bb出左世喇,,當我見到佢笑果1刻,我知道辛苦黎係值得的..!
亦都知道,就算我前路可能會好難行,,但係我係心甘命抵的!

我而家反而好後悔當時為左個男人成日唔開心,,仲大住肚食煙,好彩阿b無事乍... 如果唔係我真係喊死!!

樓主,,我唔知你同你屋企人關係如何,,但我覺得..可以ge話就搵下佢地幫手la...  就算幫唔得多,,至少有人關心下你陪下你傾計都已經好唔同了!!

我好想話你知
個bb唔係響個男人身上
個bb係響你自己身上的 佢唔明白係佢既事
佢唔負責 都係佢問題
你呢??? 因為個男人 就話唔要個bb 就話憎個bb
我話你知 如果係我 我幾憎個男人都好
我都唔會憎我自己bb...因為響我身體入面
我哭佢就哭 我笑佢就笑... 我甚至認為男人除左射粒精之外
佢嘜野都感受唔到 所有感受響你身上
點解你可以話憎個bb...
不過我聽你咁講 我好討厭你個男人
搞大左了...好似嘜都唔想理咁 你都就生喇
嘜野都未買....  又未註冊...
本來我諗可以拎綜媛丫...但你又話個男人會對你暴力
咁你認為佢會唔會打個bb?????
呢d男人連女人都打 豬狗不如
我都係勸你離開呢隻豬狗了...
雖然bb有左喇 又就黎生
但bb係你的 如果bb有呢d老豆..我唔認為係好事..
((個人意見)))

我仔仔 兜兜 1歲多d喇..
之前同你情況都差唔多,
不過到兜兜2個幾月既時候,
佢個賤男爸爸走左..
我諗如果之前有睇過我開既post大約都知點解佢會走..

由我第1刻知道有左bb既時候,
其實我自己都好矛盾..
去選擇要同唔要,
1樣都好艱難,
同佢1齊個段日子..
我陀bb咁耐,
佢就唔係我身邊咁耐,
到兜兜出世,
佢依然都失蹤..
因為佢係第2個屋企..
雖然屋企人1直以唻都係咁叫我結婚,
我都用盡好多理由去推搪..
因為係我心裡面..
唔認為係要結婚先可以生bb..
而bb係我自己嫁~
兜兜出世同佢個樣1模1樣,
起初我都怕自己面對唔到兜兜..
但係佢愈大,我反而又覺得..
bb係自己既,又唔係因為佢我先生個仔出唻..
咁就算點樣,都唔太關佢事啦~

咁耐以唻..
兜兜未出世之前,
所有bb用品,
都係我mami幫我準備..
甚至乎佢既屋企人都冇理過我!!
到兜兜出世都冇唻醫院探過我地..
so what?
男人想點係佢地既事,
佢地唔識去珍惜我地..
我地就冇必要理佢地咁多!!

孩子係自己既..
有必要為個男人去放棄 去憎恨 自己個bb嗎?

事到如今,你除左好好安胎都無野可以做到...
你同個男人講清楚,話你唔想佢再說粗口,唔好再粗暴對你,
講晒你既要求...如果佢唔肯....
做單親媽媽咪單親mama lor,仲偉大啦

個男人真係唔好咪飛q 左佢, 當佢死左囉!!   個bb 冇左 (落左好好, 你生佢出黎整C佢又好, 甚至係唔理佢, 俾人領養都好...)  唔係話想要番就要番.  呢個時侯唔可以再咁唔成熟, 做人阿媽就要盡力佢俾最好既野俾下一代.  個bb 係你既, 佢根本冇得罪你, 你有咩事佢都捱義氣同你一齊分擔, 佢永遠第一個撐你既人, 佢對你咁好, 點解要遷怒於個BB, 咁憎佢??

如果有屋企人幫手, 咁你生完自己去搵野做, 自己去養bb, 有錢人有有錢人養仔既方式, 我地一般人有一般人既養仔方式.  

我朋友都係咁, 佢識左個女人, 果個女人離左婚識左佢之後至知有左, 最後佢都生個仔出黎, 個親生老豆都係冇返去睇佢地. 而家我朋友當正個小朋友係自己咁, 佢地就黎結婚添.

俾人領養喎, 講就易, 香港地有幾多個小朋友真係俾人領養左? 當中又有幾多個既養父母係好父母?

生BB 前情緒都會好唔穩定, 生完之後都係咁架, 有咩事要講出黎, 仲要平心靜氣同你男朋友講睇下有冇辦法去解決, 必要時搵朋友和社工傾啦.

一齊左一年，但個bb己經九個月，即係你地拍左三個月拖就有左佢，跟本未了解清楚，唉！
你而家可以做o既係搵社工幫你，我覺得無論個男人點唔好你都唔可以唔要個bb，
佢己經有一個衰老豆，更加需要一個好媽媽，或者你可以搵社工申請綜緩，幫你解決經濟問題先，
到將來你可以自力更生先自己養個bb囉，船到橋頭自然直，唔好咁灰心，你仲有父母ma，點樣佢地都仲會支持你！