最近呢幾日係我身上發生左一段我從來諗都未諗過既經歷 , 可能大家未必信 , 但係我講既係事實..........

2008年4月10日晚上
我同平時一樣陪d大老細去夜總會玩。
因為我既工作關係 , 我要經常陪老細去應酬。
係呢兩年入面 , 我諗我因為呢份工作既原固 , 我相信油尖旺大部份既夜場我都去過晒。
好多男人可能覺得我份工好正 , 但係我相反。
因為我好憎同d老細出黎玩 , 嚴格黎講 , 我會由一個正常打工仔 , 搖身一變成為一隻狗 ,
d老細會為左係d女面前威 , 成日拎我黎玩 , 不過冇計 , 呢份工既收入一般打工仔係好難搵到 ,
可能我被老細玩就已經係我工作既一部份.............
烏燈黑火既房間入面 , 坐住左4個男人 , 其中一個就係我。

大家可以叫我做jason , 今年我25歲 , 由細到大拍左4次拖 ,
但係冇一次可以開花結果。我反思過 , 應該係我個人既問題 ,
我個人好鍾意玩 , 落d、落bar咩都岩 , 所以最後都係女方嗌分手收場 ,
每一次我都好後悔 , 但係改唔到鍾意玩既性格...........

「喂~老細 , 靚女到啦」maggie媽帶左4個女仔入黎。(maggie係夜總會入面既媽媽生)
4個女仔好純熟咁自己埋位 , 走到我地4個男人隔離坐低。
「hi~我叫yoyo , 你叫咩名呀??」
「我叫jason」
「咁怪既 , 點解你細你d朋友咁多會同佢地黎呢度玩既??」
「呢班契弟係我d老細 , 有得簡我寧願返屋企打鑊飛機就瞓覺」
我唔知我呢句有咩咁好笑 , 不過我見到yoyo佢笑得好開心、
佢既笑容顯得佢本身標緻既面容更加靚。

之後 , 房間入面既情景 , 同我平時陪d老細既時候一樣。
佢地3 pair人係度揸揸摷摷 , 我就一直同yoyo傾計。
yoyo原來今年同我同年 , 佢同我講細個冇左老豆 , 係阿媽帶大 , 有個細佬仲讀緊中1 , 老母就成58歲有長期病患冇做野。
一般d夜總會妹講野 , 我聽完就算。
不過講真 , yoyo份人好傻好得意 , 同佢吹水個人好輕鬆 , 又唔食煙又唔講粗口 , 同平時果d夜總會妹妹好唔同。
「你同其他客好唔同 , 點解唔抽水既??」
「哈~你就當我唔得囉」
老實講 , 一個月去幾次呢d地方 , 真係無咩興趣抽水 , 好多時都係傾下計、唱下歌算數。
我開始幾鍾意同佢傾計 , 成晚時間我同佢咩都傾、咩都講 , 感覺好好。
零晨3點幾 , 幾個老野都飲到pair pair夫 , 買晒街鐘埋單之後 , 佢地去晒時鐘酒店 ,
而我就同yoyo去左食d野 , 食完之後我就車左佢返屋企 ,
佢阿媽唔知佢出黎做 , 所以佢自己一個人係旺角住。
「你上唔上黎坐下呀??」
「好呀~反正我聽日都要返工 , 返得屋企黎沖埋個涼都冇咩時間瞓」
就係咁上左佢屋企。之後一直傾計傾到5點幾6點鐘 , 大家都好攰 , 就一齊上床瞓。
我地冇做過任何野 , 就係咁瞓到第二日。

「喂~起身啦!!我煮左野食呀」
朦朦朧朧見到yoyo , 我再望一望個鐘「嘩~卜街啦 , 晏奏兩點幾」
呢鑊野真係洗乾淨個屎忽等插。
就係咁 , 拿拿聲洗個面就返工。
「唔好意思呀 , 嘥晒你d野食 , 但係我真係遲到啦呢次」
「你俾你電話我好嘛??」
「好呀~下次請你食野補返數」

　　　　=v=cm*之後Le:??

2008年4月12日
呢一日 , 我如常咁返工、如常咁食飯 ,
但係唔知點解會成日諗起yoyo。
正常 , 係男人都知道 , 呢d地方識既女 , 玩完就算 , 千其唔好擺個心落去。
但係我唔知點解 , 有小小掛住佢。
我克制住自己「算啦~咪諗」
呢d經驗我之前都試過 , 過幾日就冇問題。

夜晚9點左右 , 我同埋d老細同埋d客去食飯。
電話突然有一個訊息。
「我係yoyo呀~你而家做緊咩呀??」
雖然口講話唔好再諗佢 , 但係個心唔知點解有小小興奮。
我回左一條短訊俾佢。
「而家我同班契弟食緊飯呀 , 你呢??你係度做咩呀??」
「我而家換衫返工呀。今日病病地本身唔想返工 , 但係唔返工冇錢洗。」

食完飯之後 , 都差唔多11點幾 , 聽到佢話病個心唔知點咁。
最後上左去搵佢.....
「喂~jason !!  帶左yoyo黎啦」maggie媽推開房門。
我第一眼見到yoyo , 個心唔知點解有小小酸 , 個佢樣真係好病。
我唔想見到佢咁病重要返工、重要飲酒 ,
就係咁 , 我買左佢成晚街鐘。
係架車既時候 , 佢已經同前兩日唔同 , 好小野講 , 佢真係好病....
我帶左佢去睇通宵診所打左支針 , 之後車左佢返屋企瞓。
而我就係佢個廳度瞓。

2008年4月13日

朝早我落街買定野食俾佢 , 之後我叫佢起身食小小野食藥再瞓。
原本呢日係禮拜日 , 正常係唔洗返工 , 但係我手頭上有d野未做完 , 我就如常咁返工。

由朝早返工到下奏食飯係咁諗起佢 , 唔知佢病成點。
但係真係唔可以對呢d女認真 , 因為根本正常男人唔可以同呢d女一齊。
先唔好當呢類女性會呃你 , 我就當佢會認真。
但係大家試想下 , 你係屋企瞓覺 , 但係你條女俾人搞 , 點頂!?
「算鳩數~唔好再諗」

下奏5點幾 , 執埋d野正想走人 , 電話突然間響。
「jason~ 尋日唔該晒你呀 , 我好返好多」
「咁咪好囉 , 今日唔好返工啦 , 休息下啦」
「我都諗住今日唔返工 , 不過我而家都無咩事 , 不如我地出黎食飯好冇??」
「好呀~我黎接你」
口講 , 就話算數 , 實際真係好難做到.......

之後我地去左尖沙咀食野 , 食完野之後我地係老尖4圍行 ,
唔知係咪尋日果條醫生咁勁揪 , 打完支針佢到而家咩事都冇 ,
又係同平時一樣鬼咁多野講 , 但係講d野又好傻 , 對住佢真係好輕鬆。

11點幾 , 大家都行到攰 , 又係上左佢屋企瞓。
之後我地發生左關係 , 係我地兩個人認識左幾日既第一次關係。
完事之後好靜 , 靜到我有d驚。
正係我唔知講咩好既時候 , 佢講左一句說話。
「不如我地試下一齊好唔好??」
自己原則話唔掂呢d女仔 , 但係個心始終呃唔到自己。
就係佢呢句說話之後 , 我點頭..............

2008年4月14日

我朝早起身 , 見到yoyo係我隔離 , 唔知點解個人好開心。
「唔理咁多啦 , 今朝有酒今朝醉。係鐘意既咪試下囉!!」
我洗完面換好衫 , 佢都未瞓醒。
佢瞓緊個樣好得意 , 唔敢嘈醒佢 , 錫左佢一下我就出門口返工。

下奏 , 電話又響 , 係yoyo....
我襯佢未出聲我就先出聲。
「你醒啦??」
「係呀 , 醒左唔見你 , 咪打電話俾你囉。你返緊工呀??阻唔阻你呀??」
我知道佢可能驚我趙完鬆 , 我就同佢講。
「痴線!! 你係我女朋友 , 有咩話阻唔阻架?? 係呀~而家返緊工 , 收工接你食飯啦」

呢日好多野做 , 要ot做到成9點幾。
我打電話俾佢又冇人聽 , 一路打都係冇人聽.......

打左成晚電話都係冇人聽。
心諗佢開緊工 , 除非係小姐房 , 如果有客坐既話係唔帶得電話 , 好正常。
但係諗到呢度 , 個人個心好唔舒服....

我臨瞓前send左條短訊俾佢。
「雖然好想聽到你把聲、有好多事想同你分享 ,
但係知道你做野係聽唔到電話。
但係有一樣野你要應承我 , 可以既話盡量唔好飲咁多酒 , 避得就避。
有時間返到屋企盡量休息多d。」

想瞓 , 始終瞓唔到。
「大鑊~呢次真係沉船 , 自己著晒」
一直撐到3點幾 , 電話響....
「我貓左....」
「你點呀?? 有冇事呀?? 我而家出黎接你」

拿拿聲著件衫 , 飛架車出去搵佢。
去到佢公司留下 , 打電話俾佢。
「喂~我到左你公司留下啦 , 我上黎接你丫」
電話入面好嘈 , 好明顯係街。
「我而家唔係公司呀。」
「你係邊丫??  我過黎接你」
電話入面有一把男人聲 , 我已經估到咩事。
「岩岩有個客買左街鐘.....」
之後個男人搶左個電話。
「喂!!」
我疑惑咁「喂~!」
就cup左我線。
果一下我個心情 , 我諗冇人可以明白我。
原來d人成日話心痛 , 個心真係會痛...........

之後 , 冷靜返小小 , 我就扮冇事send左條短訊俾佢。
「知道你唔洗再飲我都安樂d , 做完野早d返屋企休息啦 , 我都返屋企啦」
我話我冇野你都唔信啦 , 個人辛苦到不得了。
正常人我諗都唔可能當冇事返屋企瞓 , 我自問都算正常人 , 所以我都一樣。
一直係架車撐到4點幾 , yoyo打俾我。
我冇聽。
聽 , 我真係唔知可以講d咩??
唔聽 , 我可以扮真係返左屋企瞓左。

Thanks!! ^o^

之後???????

2008年4月15日

成晚冇瞓 , 個心又立立亂 , 返到公司都冇咩心機做野。
未接來電有差唔多10個 , 全部都係yoyo。
我一直都冇聽 , 我唔知講咩好 , 但係又唔怪得佢 , 我識佢已經知道佢既工作。
其實自己一早知道呢個結果 , 自己一認真一定好難受。
係呢一下 , 我決定放棄。

係下奏5點幾 , 電話傳黎一個訊息。
「尋晚我打返俾你 , 係因為個客原本買左我街鐘 , 我自己走左去 ,
諗住搵你。你唔聽我電話 , 我好擔心你有事。收到訊息回一回我」

我最後都係心軟 , 回左訊息俾佢。
「我知道你同另一個男人一齊瞓 , 我唔可以完全冇野。
因為我真係鍾意左你 , 係真既!!」

大家都冇打電話俾對方 , 不停用sms。
「對唔住!! 但係我真係冇辦法 ,
唔做呢份工我根本應付唔到屋企既開支。
我又要養阿媽細佬 , 自己長期要食心臟病藥。」

我去到佢屋企 , 佢的確係好多藥 , 但我之前冇問佢咩藥。
「你放工未??  我帶你去見我阿媽」

「我而家黎接你」

到左佢屯門既屋企 , 見到佢阿媽、細佬。
「阿媽~呢個我男朋友呀」

「伯母你好~」

的確 , 佢真係有一個50幾60歲 , 但係個樣好似60幾70既阿媽 ,
睇黎真係好多病。細佬12、3歲 , 真係中1學生 ,
佢冇講過大話。
我個心好唔舒服 , 我開始有d自責、我自責我自己點解唔信佢。

同佢阿媽傾計 , 發覺yoyo細個真係心臟有問題。
不過而家keep住食藥就冇咩問題。

好warm , 同佢地一家人食飯感覺好好 , 有講有笑。
食完飯 , 我車返佢出去公司 , 全程大家都冇講野。
我個心不停諗 , 我自問搵錢唔算太小 , 但係我都要養自己、亦都有阿媽阿爸要養 ,
要應付兩頭家 , 以我而家既收入真係無能為力 ,
果一刻我真係有怪自己點解搵咁小錢...........

到左佢公司留下。
「bye bye~」yoyo轉身就走。
「等等!!」
「嗯??」
「你返緊工隨時有咩事都可以打俾我架 , 我無論如何都會聽你電話
就算我幾攰都會聽!!」
佢錫左我一下 , 呢一刻我真係唔想佢走...........

再唔捨得 , 都要走 , 我望住佢背影 , 真係好無奈。
唔好理啦 , 返屋企沖個熱水涼 , 瞓著左可以冇晒感覺、咩都唔知。

返到屋企冇幾耐 , 電話響 , 係yoyo。
電話入面既佢好明顯係喊緊。
「唔好喊住先 , 做咩事呀??」
電話入面冇任何既說話 , 剩係有喊聲 ,
我真係唔知點好。 過左一陣 , 佢終於出聲講野。
「尋晚個客買街鐘我走左去 , 一返到黎公司就鬧到而家。」
我呢一刻唔知點好 , 有d不知所措 , 我可以點先幫到佢??
係電話入面我不停安慰佢、叫佢唔好喊。
過左一陣 , 係電話入面我聽到有一把女人聲嗌佢 ,
佢就收左我線............

yoyo岩岩打電話俾我 , 又唔知咩事 , 係咁喊 , 我要出去 , 下次再繼續