其中一個分手故事，無左佢我一樣得。
我唔算好唔開心，亦都唔會想佢返黎我身邊，亦唔會呼天哭地話無左佢唔得......
因為我無左佢都生存到，男人姐，通街都有......
以下，純屬分享形式，想講一講d故仔，真人真事。
我本身中五畢業，讀讀下書就無讀咁，學歷唔係好高，都無咩話人生目標，有份工安安樂樂、穩穩定定就得過且過。總有d人會睇唔起我，覺得我搵唔到好多錢，話無出色，做黎做去都係兼職，唔肯負責任養家咁，呢d唔重要，最重要係我行得正企得正，我點過生活，理得佢地講咩。
但問題係，我男朋友都睇我唔起。
事源，我同佢響上網識既，覺得好岩傾，識左三個月就一齊左。我點解會同佢一齊？理由只得一個，就係覺得佢對我好，覺得佢好錫我......例如會接我放工，送我返工，個個禮拜都倍我出街咁。
問題出現響我轉工果時，當時我呀媽想我做份高少少人工既工，呢份就係合約技緩助理。我開頭唔知係做咩，入到去先知原來係清潔工，我本來都唔想做，但見我呀媽好想我人工高少少，話福利好好多，所以捱左差唔多成個月。之後，就開始覺得佢對我變左咁，例如出街時少左同我講野，次次都要我搵話題黎傾。佢份人無咩主見，下下都要我林去邊玩，但當我地去果時就覺得好唔滿意咁。
但都係忍在一忍，直到我無做清潔工，做返之前果份快餐時，佢個人就變喇。本來，佢唔比我做返快餐，話成凌晨先收工，又話好馬不吃回頭草，但生活迫人，到到都抄人，有工咪做著先，而且我都想讀下書，半工讀既做快餐最好喇，夾到時間嘛。
我知佢唔多讚成，但我都繼續做，佢都有接我收工。但言語間，知道佢根本睇我唔起，例如講：「xx快餐店d野比狗食既(我日日都食，咁姐係話我姐)」、「xx快餐店d工都唔係人做既(姐係話我唔係人)」。
最後，有日佢接我放工，果日好多野做，我見人地既男朋友都日日幫女朋友手，我咪求下佢幫一幫我手囉，點知佢一句：「下！唔係嘛！呢d你既事黎個喎！」
好，我都忍下喇，之後就叫佢唔好再接我收工，d同事見到我男朋友幫都唔幫我手，個心都唔多高興喇，話佢唔知係咪鐘意我。但佢反而罵我：「無利用價值，咪叫我走囉！」
好，我又忍。直到同去行山，佢一句唔埋就話：「我為你做咩都無用，做你又罵，唔做你又罵，最好我就咩都唔做。」。好明顯，佢話我唔比佢接我放工既事。跟著行街又唔拖我，又唔講野，又急著要走咁。
所以，我sd個sms，話要佢對我好少少。
「我唔敢同你講真心話，你都唔想為我做任何野，同你講野好辛苦，今晚唔傾電話喇。」跟著我同佢都無打比對方。(平時一日一通)
跟著果日佢sd返黎
「你想分手既，不如sd個空訊息比我，無謂大家難做」
我sd返比佢
「我只係想你對我好d，其實你係咪最想分手果個？」
之後佢無再覆，響msn hi，佢話要分手。我喊著打比佢，叫佢唔好咁絕情啦，同返我一齊啦，我只係壓力大，發下脾氣姐。點知佢cut左我線。
最後sd左個絕情訊息我：
「我曾經以為我地既關係有改善既空間，但最後呢？不想失望，就別有期望。勉強在一起也不好吧！我也不想令人有所奢望。以後都唔好打比我、sms我喇，我唔想black list什麼人。你也搵一個全心全意對你好、真心真意為你付出，和你真正覺得滿分既人。」
