少少感想
在下琴藝不精，加上天生音感幾差，偏偏學的是小提琴......
不過愛情呢樣野真係無得解的，哈!
係呢個論壇識過一D 朋友，曾經都幫助過我，我亦覺得討論氣氛幾好，所以想將近來一D D 小發現分享下，希望能收拋磚引肉之效，多D 勁人講下野。
話說在下去年決定到外國留學，於是離開左香港。
一個人係外國幾悶的，於是都仲會keep住練琴，由於無老師係身邊，諗的事開始多左好多。
例如開始認真思考一下我右背(只是右邊)練得耐會疼的原因，仲有好多好多問題。
關於練琴理論上的道理，都睇過下一D 書，只係一直好似同自己無乜關係咁。
有一日，我諗起以前睇過一本書講Alexander technique(建議各位有時間去睇下呢類書，個人感覺即使唔學樂器，對現代人的健康都幾好的)，於是學下發明人咁樣，除哂衫企係鏡前面睇下自己練琴時的骨架係點樣的。
即刻發現，原來因為我成日將個琴托得高過水平，但又唔俾自己膊頭聳起，所以脊椎不自覺地向右彎曲，時間一長，自然對右背肌肉造成好大負擔。
再仔細觀察，發現由於不自覺想望住個琴(其實唔望都拉到的，但雙眼張開又唔睇譜時就好自然會望住個琴......)，但因為我係近視有戴眼鏡的，所以眼珠唔轉，變左扭左個頭去左邊，呢兩點加埋一齊，令我個人姿勢唔自然，身體失去平衡(係肌力上的平衡，我未至於去到企唔穩個種呀，哈哈!)
呢D 脊椎上的扭曲，由於著左衫唔係太睇到，可能係咁，一直都無人糾正過我。呢個問題令到我成日無法好好咁控制雙手(睇Alexander technique D 書有話過，脊椎，特別係頸椎，對於全身的協調至關重要，如果關節位置唔好，會好大影響，令人的協調性變差動作笨拙)
試過一兩星期每次練琴開始都望住鏡慢練scale(練scale以前一直都有做，但唔會除衫望住鏡做)，重點係無論隻手點郁都盡量保持脊骨係正常姿勢
由於惡習易積難改，雖然已經有進步，我仍然一唔小心又會舊病復發，但至少而家練琴點練都唔會背疼，最多都只係練到手軟 :p
咁好開心咁發現，呢個小小的發現，令我練double stop比以前順手好多，至少而家可以慢慢出到好乾淨的thirds，以前練thirds真係辛苦過打交咁，一去到換把直頭要同個琴搏命咁
我唔敢話而家拉得好好，但起碼而家練琴個感覺會係，只要練就會進步，唔會好似以前咁練極都係咁死款
順帶一提，發現練thirds真係好有用，對矯正手型好有幫助，手腕太高太低，都會按得好唔順，只有剛剛好個個住先至舒服
希望我呢個小小發現/心得，會對大家有少少幫助。
