即將要離婚, 2歲仔仔跟媽媽. 我要點樣先可以做個好爸爸? 點樣做先可以減少因父母分開對佢帶黎既影響? 我好擔心佢既心理會同其他小朋友唔一樣. 先謝.

我自己都係單親家長大，其實只要做返你做爸爸既野就得啦！
記得多去Ｄ探佢，唔得閒都比個電話佢同佢傾下日常野，
如果可以就多Ｄ解釋比佢聽(因為佢得兩歲太細啦)，
爸爸媽咪只不過唔再一齊住但其他野依然係無變既，
最後想提提你要同前妻關系好Ｄ，如果唔係你同仔仔既關系可能會有影響

我父母離婚,幼稚園已經走曬佬,我都想知點樣叫單親家庭既好爸爸...

我明白我冇資格做一個好爸爸
無論我點做, 對個仔都會有影響, 只係希望將影響減到最少
我連一個正常既爸爸都唔識做, 更何況係一個離婚後既爸爸呢

+油, 好欣賞你對個小朋友咁有心, 希望唔好口哩講(想做好爸爸ge言論), 因為我老豆都係咁, 係大家仲有關係時放棄我地, 當我跟媽媽捱過苦日子後, 居然走來說要想念我們, 對我來說他的行為簡直不可原諒

其實你對個細佬仲咁有心, 點解又要離婚啫, 或者會話因為細佬而勉強一齊大家會苦, 但係如果雙方都關心小朋友身心發展, 點解唔可以因為佢去連繫

除非你/前妻真係做咗d不可原諒ge事

我諗您哋有一定理由非散不可，但最緊要係您倆可維持互諒、唔討厭對方嘅關係。呢個對三方面都好重要。

咁樣仲可以形造一個接近 "家庭" 嘅環境，您倆仍可擔當父母嘅角色，較容易會接受不同住嘅事實。

我都唔想攪成咁. 而家可以做既係點樣可以為個仔做多d野, 補償我以往所犯既錯. 雖然後知後覺, 但總好過咩都唔做, 係度自怨自嘆

而家我仲可以做到你所講既, 但日後一旦另組家庭, 環境因素可能唔容許我咁做. 不過我會努力去做, 盡量俾多d父愛佢

樓主，好欣賞你，起碼你有心去做一個好爸爸。
首先唔好在仔仔面前數前妻的不是。
最好等仔仔入學後盡量出席學校的家長日，小朋友係好羨慕父母一齊出席家長日的同學。
早幾年小女參加一個社區活動，中心邀請父母出席，有一個女孩子眼見個個小朋友都有家長出席，惟獨她沒有，她哭了出來 。

多謝你, 但我真係受之有愧.
多謝提點, 日後無論幾忙, 我都會抽空出席

只希望樓主日後能記住今天的諾言，做個好爸爸！
最壞的父母是對孩子不聞不問。