龐奴現場﹕後奧運新北京的生存理由

【明報專訊】一切回復正常嘅後奧運
北京
，有乜嘢真值得去呢？
真正嘅北京之旅，奧運過後先正式開始。酒店價回落，天氣入秋放晴爽朗。北京或者真係可住可遊啦。以下係近月來嘅綜合點評，當南鑼鼓巷、後海、大劇院都太濫了，你可以有以下選擇，大約見到新北京面貌。
大路一啲，先由奧林匹克公園開始。呢個公園無疑已變成北京新地標，10月正式對外開放，改建計劃還未落實，將來變做娛樂中心也好，演唱地也好，你總要到呢度影個相留影吧（係，鳥巢將代替天安門
成為到北京必留影的top one地標）。之前奧運期間要入場券，之後就唔使喇。
當然，10月嚟嘅話，仲可以去兩大音樂會，一個係迷迪，另一個係摩登天空。9月29號就開show。至於9月10月開始排住隊嚟嘅其他國際大牌組合就有AIR同Linkin Park。至於睇展覽方面，最近值得推薦係中國美術館入面嘅蔡國強作品展覽。
至於烤鴨嘅排行榜，最近加多咗鴨緣呢間店。鴨緣唔起眼，喺三里屯一間城市賓館入面，但即叫即烤呢招相當有號召力。如果利群係食胡同風味，大董最近穩佔第一，鴨王成後起之秀嘅話，鴨緣就算係最新發現。至於全聚德確係好有保留，前門重開嘅店唔設訂位要早早去排隊，營造門口人多之勢真係唔要得。
講開鴨緣，就一定要提到呢個所謂新三里屯圈，的確係而家最宜居宜玩嘅北京中心。因為我亦宣告喺盈科太平洋百貨後面嘅1949為近排最in新浦點，有大院子同廠房紅磚式建築，秋涼天聚喺院子大樹下飲番杯已經係好好享受北京嘅其中一個理由。
再加上同一區嘅眾多食店，選擇極多。最近發現對於香港人好重要嘅金易來茶餐廳，喺北京嚟講算係極為正宗，通粉嘅火腿有切絲，雲吞麵正宗，收香港有線電視
台，香港報紙雜誌，仲有黑白牛牌花奶疊成金字塔，同埋WiFi
。喺呢度食完個late lunch，然後去無幾遠書蟲cafe做嘢見人，已成為村民嘅例行公事。連埋對面三里屯VILLAGE嘅APPLE SHOP，呢度無疑已係北京版嘅SOHO。
再打比喻嘅話，遠少少嘅新光天地，就係PP或又一城，有齊光鮮商場，擬似CITYSUPER同真正嘅MUJI。
將會HIT出嚟好似南鑼鼓巷嘅風味小街，就係國子監街。國子監孔廟合拼重新開幕，令到呢區翻新得較企理。連同南鑼鼓巷行出無幾遠嘅MAO——最近年青人最愛夜場，呢區則係另一款胡同風味蒲區，同新三里屯各有風味也。