方珈悠（Jaime）係去年最遲一批加入樂壇嘅新人之一，專唱跳舞快歌，更講到明走健康性感。個樣望落有幾分似Sammi（鄭秀文）嘅Jaime， 就連路線都跟到足，咁樂壇從此會唔會多咗個性感跳舞天后呢？
在新城頒獎禮上奪得新登場女歌手的Jaime話讀書嗰陣， 都有好多同學話過佢似Sammi，佢話：「Sammi拍《百分百感覺》嗰陣，我把頭髮嘅顏色都同佢一模一樣。我都好鍾意佢啲歌，特別係《不拖不欠》、《愛的輓歌》，再加上佢喺戲中嘅傻大姐性格，超正！」
唔單止同學話佢似Sammi，最近喺網上面亦有網友提及，Jaime知道後當然開心，話晒係天后喎！但佢揚言：「咁似大明星梗係好，但總想似番自己，希望大家記得我。」
陳柏宇師妹
要記得Jaime可以有好多方法，其中一個係：佢係陳柏宇（Jason）嘅師妹，亦係佢嘅同學仔。Jaime話入行都係因為Jason。
「我喺加拿大讀Grade 11嘅時候，已經同佢係同校同學！（佢追你呀？）唔係，加拿大圈子細，中國人好少，所以喺學校一定識得晒所有中國人，而佢亦係我好好朋友嘅男朋友，所以熟佢。起初有個圈中人叫我返嚟試音，有個咁嘅機會，屋企人又唔係點反對，2年前就返咗嚟試下，但係等咗好耐都冇消息，咁就返嚟做下嘢再算，後來Jason知道我有興趣唱歌，公司又想搵個女新人，所以就介紹咗我入行。」
認低能好傻
新人最緊要和藹可親，高傲、輕佻、寸嘴都係大忌，外形望落去有少少寸嘅Jaime，都怕外界會誤解佢。好啦！就俾30秒佢自白，介紹自己！「好多人會因為我個樣而覺得我好寸，或者好唔友善。其實識咗我之後，會覺得我好低能，同埋好傻，好容易信人而被人呃，講少少嘢就可以呃到我。我係個好靜、非常慢熱嘅人，可能要見幾次面至會同你傾偈。不過記住，唔寸㗎！」
