成日聽到的家長講, 而家的細路越來越難教, 本文打算討論此現象之成因, 及父母可以做的乜.
[1] 點解細路越來越難教
[1.1] 因為社會變化節奏越來越快 - 試想象, 如果你係老師, 你要教的學生去參加公開考試, 而個公開考試既內容係每年重大改動一次, 改到同往年完全唔同咁滯, 咁你會點? 你會覺得好難教, 因為你自己都要適應, 你自己都要追, 追得好吃力, 追完仲要教人. 而相反, 如果果個公開考試既內容係十年如一日, 你就會教得好輕鬆, 因為你可以 "食老本", 年年都係咁教, 都唔會有咩變化, 你拎返十年前果套準則去教亦可. 以上係比喻. 說明了一個情況: 父母要教細路了解社會, 了解世界, 但問題係, 個社會, 個世界, 變化速度越來越快, 父母要 keep 住自己唔同時代脫節, 本身都已經有難度, 何況仲要 "教" 細路. 有時自己都未顧得掂, 自己都未跟得上, 係某些事項上, 係某些領域內, 你的仔女可能仲知得多過你, 快過你.
[1.2] 因為資訊流通越來越容易 - 以前既時代, 相對地, 資訊流通唔係太易. 係互聯網未普及既時代, 要認識陌生人, 與陌生人交換意見及資訊, 唔係容易既事. 係果個時代, 父母/老師握有大部份資訊權力, 知識從上而下地灌輸. 但, 互聯網普及後, 知識變得發散, 不再集中. 年青人好容易可以係網上找到有用及可信既資料 (例如維基百科, google 字典, 之類之類..). 知識不再由父母/老師壟斷, 父母/老師如果有錯誤亦較容易被揭發. 另外係討論區/日誌/.. 之類媒介亦有助收集 "民意", 例如如果仔女不滿父母, 可以將父母既事情放在網上公開討論. 人流密集既討論區, 一個題目閒閒地百幾人回應, 冇個別任何人可以掌握輿論, 就算父母參與其中亦難以影響/難以控制討論方向, 結果仔女 (相對於以往資訊不流通既年代) 就比較容易獲得外力支援.
[2] 父母可以做的乜
[2.1] 與時並進, 多了解社會/時事/科技/潮流資訊, 勿脫節.
[2.2] 虛心, 放低成見, 今時今日, "長輩" 係知識上未必有優勢 (你個仔問你野, 你係咪一定識答? 佢上網查 "yahoo 知識", 幾乎乜都查到..), 接受 "知識是發散的" 這個現實, 同仔女一齊終生學習.
