發現好多新手問及有關蛇同埋花既問題, 總括而言, 無論係十三張抑或鋤大弟, 都係依循以下法則:
1. 玩鋤大弟, 任何蛇同埋花, 基本上都係先睇數字(先比較最大既數字, 相同既話就比較第二大既數字, 如此類推), 直至5隻牌既數字都係一模一樣, 先至以花色來決定大小
2. 玩十三張, 雖然係有(花)呢種東西存在, 但如果兩條蛇或者兩條花, 5隻牌既數字係完全一樣既話, 基本上並唔會以花色計算大小, 而係當打和, 或者當莊家贏
3. 承第2項最尾提到既情況, 究竟幾時當打和? 幾時當莊家贏呢? 呢個就要視乎大家既玩法; 假設4個人玩, 而大家係用一種俗稱(星球大戰)既玩法去玩, 即係甲乙丙丁各自都會同其餘三個人鬥牌去計算輸贏既話(例: 甲贏乙1注, 輸丙1注, 輸丁3注, 咁即係果舖甲總共輸3注), 咁第2項所提及既情況就當打和; 但如果係用(1個莊家,3個閒家)既玩法去玩既話, 即係3個閒家都只會同莊家鬥牌而唔會互相鬥牌, 咁第2項所提及既情況, 以及所有莊閒打和既情況 (例如大家個頭都係KK5), 一律都當莊家贏, 如是者, 如果莊同閒都報到既話, 一律都係當莊家贏. 呢種情況, 俗稱(莊家食夾棍)
4. 花色大小次序: 葵扇>紅心>梅花>階磚
5. 承第1項, 鋤大弟, 如果5隻牌數字完全相同, 就要用花色來判別大小, 花既話就唔駛多作解釋喇, 蛇既話就睇最大果隻
4. 數字大小次序: (十三張) A>K>Q>J>.....>3>2 (鋤大弟) 2>A>K>Q>.....>4>3
5. 無論十三張抑或鋤大弟, 蛇都係得十款: A2345, 23456, 34567, 45678,56789,678910,78910J, 8910JQ, 910JQK, 10JQKA......................JQKA2並唔係蛇
所以根據以上法則, 玩十三張既話, AKQJ10就係最大既蛇, A2345就係第二大(因為K>2) , 910JQK就係第三大(因為A>K), 最細既蛇就係23456.
而玩鋤大弟既話, A2345就係最大既蛇, 23456就係第二大(因為A>6), AKQJ10就係第三大(因為2>A), 而最細既蛇就係34567
多年玩牌經驗, 咁多年來牌腳數量無一千都有八百, 亦都試過翻查過典籍, 包無錯!
出黎玩好多無賴, 會為左自身既利益又或者基於一知半解而虛構好多騎呢野出黎, 千祈唔好被人呃.........我好少發帖, 今次發帖旨在提醒一下大家, 尤其係各位新手.....
