學車手記
第一天 2009年3月7日 2130hrs to 2330hrs
終於等到張學牌，路試亦安排於4月24號，時間唔多，所以今日就開始上第一堂，大約早二十分鐘到「平X」，交收學牌，就等7點半果批學生返o黎，留意到個架到大大話都有成40個學生留度的頭盔，其實都應該幾多人學喎。
9點半，上批學生陸續返來，師傅同我打聲招呼，傾o左陣就上車，先附近街用2波行了幾個圈，試一試部車，架車行就okay呀，但一落波我就試過入空波，好彩係減速，就即刻入返1波，但依方面真係要小心D。
之後，師傅見我習慣無問題，就帶我同另一個師兄去天光道行轉，沿途手勢指示我轉波，重行到4波，其實都有D驚，因為學Van仔我都係用到3波，4波有幾快我真係唔知(原來都係得40-50)，但其實師傅都控制緊我的速度，要我留返安全距離，行轉試場，就帶我地去樂富睇下打8字條路(主要係師兄去學)，但途中就發生小插曲。
位置在太子道準備入九龍塘前的橋底，當時我地一行4人(有一個師兄中途加入)，剛剛紅燈，我地頭位，四架車就兩架兩架分兩行平排，一條行車線，綠燈一起步，師傅右面開行，我跟住行佢左面開行，其實我都唔算慢，唔知後面幾時有架的士衝出o黎，想入我位，話雖當時係得一條行車線，但都好闊，一來我又真係無霸住條中間線(靠o左少少左)，二來我見架的士來勢凶凶，此終都係皮包鐵，撞倒都係自己受傷，下意識就收慢靠左，架的士就當然扒頭，師傅見到，就直頭停車，話個的士司機，有無顧住其他人安全，當時後面都有其他車，的士司機都無聲出。
之後去到樂富，師傅先講，雖然我唔係正中間線，但其實我無需要讓路俾佢，你讓俾佢，到時如果有意外，個的士司機重可能掉頭話我係插入o黎，其實都有道理，經一事長一智，下次要小心D先。回程九龍城對出迴旋處死火，架車多次死火，都唔知咩事，差D要推車返去，好彩最後都開返著部車，安全返base。Book埋下次3月11日第二堂…
P.S 之前有post話個師傅鬧人，師傅都話自己係好火，但我又覺得佢個人無咩o野呀，你可以話佢多口水，但都係經驗分享o者，問心講，話你係見到你錯先教你同你講，無心教都唔會浪費口水喇！
