發新話題
打印

AV Amp 新手篇

AV Amp 新手篇

近日見很人都問AV器材選購,其實好多時問題都很相似,不如就嘗試寫一篇文章,有部份可能是個人觀點,希望對網友有用。很多朋友玩音響都是從AV Amp先,以一般打工仔來說,入門級的Budget通常是幾仟至萬幾,始終是血汗錢,大投資,所以會左問右問怕入錯貨。

5.1/6.1/7.1如何選擇 (先考慮自己的聽音/影音空間的尺寸,是否可以如廣告所述來安置咁多隻喇叭)

人通常是貪心的,總會以為7.1一定是最好的,sell屎亦會這樣引導你,但忘記了是否與家居配合。一段香港家居都是很細小的,究竟7.1是否最好呢?很多資深用家都會說效果不大,因為真係好難玩得好,如把四隻後置都裝在後牆(後面大聲過前面????),不如玩5.1。
如果沒有調校好5.1系統,成日覺得後置沒有聲出,一於加大佢,到頭來,得不到包圍感之餘,聲音又怪,或只聽到超低音的拍邊聲。對5.1系統調校的沒有認識,根本發揮不出部機的威力,正確方法是音壓表測試,相信別人寫的程式,較出來的聲音一定好,自己胡亂設定不能調出好聲。同時,後置的擺位亦有很大的影響,通常人耳的高度及在耳後一米,試問香港家居又如何做到?所要在香港,要玩好5.1不易,所以這裡很多人都是用兩聲道來看電影。
如果玩7.1,調校的難度更高,地方的大小與放多小隻喇叭有關,每隻喇叭相距不應太少,唔好貪多,搵人問意見可以,但最好問用家意見,毒氣室試音後意見可以自己感受唔使假手於人。
所以,好的surround effect要靠好的空間做出來,不是靠喇吧數目及要有有效的調校。

Movie : Music

通常很多人會問Movie : Music是60%:40%或50%:50%這類問題,又會有人的結論是Denon適合Movie,Marantz及Onkyo適合Music,既然有人有這樣的結論,你可信別人,亦可信自已,但反而這問題是否重要?到底世上有冇一魚多吃?
如果用DVDP做訊源,用AV amp的DAC,訊源已不是很好,同時喇吧及線材的表現亦有影響,何必執著這分別,最緊要自已試時滿意happy,要Music不如影音分家,否則,有聲出,聲音OK,當係bonus便算。到最後發覺自己套mini-hifi仲好聲,不如慳番d精力同錢買多幾套靚碟仲好。
影、音跟本係河水同井水,在設計概念上已有明顯分別,如果係都要兩用就請不要有要求la!
記住,這是入門級,寧願日後有錢,影音分家。

AV Amp Power

其實在兩聲道世界裡,50Wx2與80Wx2的分別是否很大?很多時都要看情況,如果用8ohms書架喇吧應該分別不大。那麼AV Amp 130W per channel to 100W per channel的分別又如何?一般家居通常都是用小型書架喇吧放在影音櫃上,中置放在電視機上,只能說火數大的心理因數勝於一切,如你有幸可在你家中試齊同一牌子不同型號,你又會發現分別有幾大呢?再玩埋Blind Test又會什樣?同埋一般的試音室面積與你的斗室相差多少呢!切記,試音室與家居環境分別太大,你自已得果佰幾二佰呎,買機時的試音室又幾多佰呎。

揚聲器

由於今時今日既科技先進5.1/6.1/7.1糸統要求隻隻喇叭都要一樣,咁先模擬到坐位被360度的聲音包圍效果,如果budget有限或地方問題,最好買5.1 speaker set,一套過,唔使煩,如果打算只玩AV,買5.1喇吧套裝會較好,超小喇吧,再把低音部份由超音負責,女人一定happy。

多數人對後置一般都冇乜大要求,只要不會與前置的級數相差太遠便可,但如前所述,對後置無乜要求,咁!對其他都唔好要求la。另外十居其九會將後置放得好近坐位,同埋吊高,實際聽感會有D古怪,耳筒feel!!

入門級座地喇吧不要信佢有好好的低音(佢只不過做長D對腳唔使買腳架咁解,其實仍是一對書架),一般都要加超低音,買個好少少的超低音會較好,如果負擔得起(豪華入門級),買個二仟元以上級數的會較好,因為很多時大聲壓的包圍感,如有強勁的超低音,真係唔同晒。

但如果要分開買,最好買8ohms喇吧,會對AV Amp的電流需求較細,4ohms會要求較多電流。理論上,五隻喇吧要同一型號,不存在後置中置用差少少的問題,在電影院裡,會不會有前後喇吧不同呢?但一般玩法的卻不同,可能有人覺得後面來的聲音較少,所以用細少少,至於前中置是否要同一品牌,又是一個沒有絕對答案的問題,心理因素覺得會夾聲勝於一切。

如有打算日後影音分家,或會較多聽歌,前置最好買好少少,入門級budget客不宜考慮。

線材

至於線材,首先,最好不要貪方便,一定要格價,隨時買貴野。
反而用專業線又平又好用,例如,Mogami, Canare, Gotham, Northwire, Belden等牌子的DIY線,全部都是由十幾元一米至五十元一米的線,幾佰蚊應該夠,後置由於用得多線,買$2-3一呎的線便算了。以入門級,這樣用已不錯,錄音室及剪片房或制作DVD的地方都係用呢D貨色。

銷售點及格價

買機地方通常都是旺角銅鑼灣的樓上鋪,或者豐x,至於邊間老實,好難答。其實只要自已小心,唔對路便走,勿貪便宜,從網上見到別人的苦水,通常都是有價冇貨,可能是水貨,可能是退貨,很多可能性,但切記,不要落訂等下一水,很多人中了計。如果睇中左,試下D fd用緊的器材,電話直銷訂貨/格價都可以考慮

總結

入門級新仔最易呃,搵個信得過的朋友一齊去入局,多個照應,中計都可以賴個friend衰,等自已好過些。sell屎俾offer你要小心,開個會先好,甚至走先再返轉頭,同埋如果覺得sell屎有問題,咪走人,去過第二間。
最重要是買左機後要做功課,睇說明書,研究點玩AV amp,買聲壓表度清楚,set up好套機,要玩好AV絕對不易。

至於最重要的牌子問題,仲難講,只能說自幾鍾意邊部就邊部,同埋唔好貪平買部會在心裡留下刺的機,都係果幾個大牌子啦,各有捧場客,根本不存在邊個牌子明顯好個另一牌子的問題,主要是考慮個人喜好、sell屎sell成點、靚仔及$$。
買喇吧的情況都是一樣,切記不要聽sell屎講買一些不知明的牌子,甚至明明是國產機,又話Design in England,又或者老細是加拿大藉香港人,又話係加拿大貨,其實係國貨,查下佢個網頁先啦,好過買左之後先被人用 “唔駛理佢邊度生產、咩野牌子,最緊要自己覺得好聲,玩得開心” 呢句話安慰。

Budget低不如玩DVD+5.1 set仲好,多少少才考慮AV Receiver+5.1 speakers set,起碼speaker細隻,後置較易放在ear level,亦可用後置腳架,AV Amp 的Power亦可較低,以前未有5.1 speaker set就要分開買,而家應考慮佢先。

還有另一玩法是7.1 AV Receiver+5.1 speaker set+ Stereo speaker one pair,另一對喇吧接在AV Amp的Speaker B,這便可以玩多對喇吧,再日後影音分家,最重要是對AV小喇吧可放在大喇吧上,慳位,又可手多來玩玩7.1。

另外多點去別人的家試聽不同組合表現,令自已有一套客觀的音效/音色標準,否則好難知道自己的要求是否合乎實際環境!!

以上內容全屬個人或個別網友意見,及一些個人心得,如有不同意見,歡迎指教

TOP

發新話題