[東方日報]賽前分析~車仔收油下盤有利~

今晚歐聯八強次回合續演「英超內訌」，車路士主場對利物浦。車仔首回合作客贏三比一，「紅軍」今場起碼要入三粒先有價講，晉級機會可謂微乎其微，既然車仔有兩個「燕梳球」在手，今仗即使落敗亦唔會介意，咁作戰心態又點贏波？車路士讓平半，樂比仔全力支持下盤。（now 670周三凌晨２時45分直播）
首回合一戰，利物浦雖然先開紀錄，但落後車路士控制戰局，若非臨尾收夠籌，利物浦隨時唔只輸兩粒，不過呢個比數，相信已足夠令車路士晉級。因為歐聯（前身歐冠盃）五十四年歷史中，僅得一隊首回合落後一比三情況下，最終能夠晉級，而車路士以往歐洲賽主場最大敗仗都只係輸○比二，綜合兩項數據，車仔晉級穩如泰山。

樂比仔花咁多篇幅講車路士晉級在望，無非係想帶出一個重點，就係車路士今場有輸波空間，就算輸○比二，兩回合仍打和三比三，車仔亦可憑作客入球條例晉級。當然，車路士今仗唔會特登放軟手腳等紅軍反擊，但如果利物浦先開紀錄，又或者膠狀態，車仔都會滿足於現狀，有利開出下盤。

況且，車仔近期防線真係唔多穩，上周末聯賽對保頓，領先四球情況下，畀保頓連追三球，加上今仗有隊長泰利停賽，剛傷愈復出卡維奴狀態亦未十足，隨時畀利物浦偷雞入到波。