[東方日報]賽前分析~斯肯爭升班同李城鬥入波~

就到季尾，冇咩比鬥心更重要，英甲盟主李斯特城呢期係威，但冠軍，家陣仲有乜好搏？反觀對手斯肯索普仲要為附加賽席位努力，就算作客都肯定焗住要攻，揀1.78倍入球大係明智之選！（開賽時間：周六凌晨2:45）

以波論波，陣容英甲超晒班李斯特城點秤都高過斯肯索普，首席射手費耶特家陣已經轟入廿六球，呢位小朋友賽前揚言好希望可以踢足餘下賽事，趕過布里斯托流浪列治林拔成為英甲神射手，相信領隊皮雅臣都會順佢意，派呢位當弗射手落場數胡。
對家斯肯索普暫排第七位，但只係比第六位燦美爾少一分兼打少場，要殺入升班附加賽仲有機，今戰梗係搏命啦！呢班波出名攻強守弱，陣中一對箭頭賀柏同希耶斯合共轟入三十七球，弊在條紙紮防線唔生性，家陣已經失成六十球咁多。依家李斯特城篤定升班，成班球員冇晒壓力肯定踢得放，斯肯索普要踢得進取，點睇都唔慌入得少啦！