[東方日報]賽前分析~紐文西亞主Ｗ包掂~

前晚英格蘭足總盃四強，曼聯對愛華頓盤口變化認真大，一周前呢場波早餐盤已開出曼聯讓一球，但大戶賽前收到風，知道曼聯會派好多後備落場，結果開波前插到落曼聯讓平半，上盤仲要高水細盤亦係咁落飛，結果兩隊互交白卷，大戶執唔少。
周中冇歐洲賽，但英超及西甲開快車，一樣咁有睇頭。肥叔先講一場西甲心水，就係紐文西亞主場對畢爾包。紐文西亞依家排包尾，距離尾四希杭有五分差距，但仲有七場比賽，唔係冇護級機會。

紐文西亞呢隊波冇叻，勝在主場夠惡，今季八場勝仗，有七場都主場取得，勝率接近五成，今場平手盤確抵玩。
事實上，畢爾包近況亦唔好，近六場輸五場，近三場作客更係輸晒。上仗作客拉科魯尼亞，對手賽前落重飛，結果真係飛到波到。今場大戶亦睇中主隊紐文西亞，相信主隊又可順利開出。