巴塞大解放猴擒寶座
17/05/2009
文： 法比加輝
上周意外被維拉利爾搞寸Party，相信巴塞隆拿今周都唔會再咁「孤寒」，作客馬略卡肯定入多幾粒，全力爭勝捧盃！截稿前未知維拉利爾對皇馬賽果，所以未知巴塞能否提前捧盃，但因歐聯決賽要到月尾先上演，所以巴塞終於都可以冇後顧之憂下踢聯賽，專心一致，贏波好Easy。（有線足球台61周一凌晨1時直播）
其實只要皇馬今周贏唔到維拉利爾話，巴塞賽前已經可以提前捧盃，不過加輝認為關係唔大，皆因聯賽錦標已經係巴塞囊中物，只係睇幾時正式「確認」。所以，估計巴塞班球員都會放開懷抱應戰，唔會好似上場咁，為主場開P而勒住勒住，最終連主勝都開唔到，今場冇壓力肯定有助發揮。
往績食住馬略卡
現時馬略卡有四十五分，已經提前護級成功，但同時間亦冇資格爭來季歐洲賽資格，所以餘下三場聯賽都係風流波。既然鬥心欠奉，質素較差馬略卡實在難與巴塞周旋，話晒巴塞近六次作客小島球場贏足五次，今晚一於簡單再取客勝。
馬體會華倫大駁火
至於另一場較受關注賽事，就係「四哥」爭奪戰馬德里體育會對華倫西亞，加輝認為投注者毋須腦筋揀邊隊，入球大先係最穩陣。西甲踏入季尾經常出現大波膽，箇中原因當然係球隊要追分冇得諗，大無畏全力進攻。華倫近七場全部開大，而馬體會就近七場開六次大，入球大點可以唔追呢！（有線足球台61周一凌晨3時直播）
拉闊推介
巴塞隆拿勝
馬德里體育會大
貝迪斯勝
