[東方日報]賽前分析~冠軍已成狼中物~

德甲今晚煞科，聯賽冠軍、下季歐聯同歐霸聯賽（前身為歐洲足協盃）參賽席位同護級形勢全部有待揭盅，十八支德甲球隊仲有十隊有爭，實在好睇過戲。不過講到爭霸，「狼堡」禾夫斯堡佔據絕對優勢，主場面對力疲心傷又有後顧之憂雲達不來梅，只要唔輸就可以歷史性首度登基，練馬加夫賽前信心十足，話明要以一場令人信服勝仗奪標，絕不求和，相信冠軍銀碟已成「狼」中物。

德甲前四名只差三分，不過哈化柏林落後三分兼廿四個得失球差，基本上已經爭霸無望。拜仁同史特加落後禾夫斯堡兩分，得失球差亦處於絕對劣勢，兩隊互撼除要擊敗對手外，仲要寄望禾堡主場輸畀雲達不來梅至有望奪冠，難怪兩軍都話以爭奪亞軍為目標，換言之已經承認禾堡奪冠難以動搖。「狼堡」禾夫斯堡主場迎戰不來梅，球隊上下一心，誓以大勝迎接球會史上首個德甲冠軍，黑柴捧「讓球主勝」。（有線體育台62周六晚9時30分直播）
禾夫斯堡係下半季表現最優異球隊，前線三叉戟超卓表現更加震驚整個歐洲，雙箭頭加菲迪同迪施高分別以廿六同廿五個入球佔據射手榜前兩位，今晚除爭霸，兩人亦要鬥入波爭奪神射手獎，佢身後仲有助攻王米斯莫域支援，呢位波斯尼亞國腳今季已經交出驚人十九次助攻。除三叉戟，禾堡隊長祖殊今仗停賽期滿復出，呢位防守中場宣布同球隊續約，足以起到穩定軍心作用。以佢今季聯賽主場十六戰十五勝一和驕人成績，今晚爭霸關鍵時刻絕對唔會「臨尾香」。

不來梅歐洲足協盃決賽苦戰百二分鐘後不敵薩克達，可謂力疲心傷，短短三日時間好難回到氣，球隊早已放棄聯賽，佢已經將全部希望放晒下周六對利華古遜德國盃決賽，今晚煞科日作客隨時交行貨，若然禾堡可以趁早取得入球，不來梅都唔會浪費氣力作無謂抵抗，主隊大勝可期。