[東方日報]賽前分析~藍翼歎魚腩煲~

亞冠盃分組賽今日上演最後一輪賽事，G組水原藍翼主場對「魚腩」新加坡武裝部隊。藍翼荒廢聯賽，全力爭取於亞冠盃出線，為免前功盡廢，肯定唔會掉以輕心。武裝部隊作客曳到唔恨，料會再度大敗，「讓球主客和」藍翼讓兩球，照捧「讓球主勝」！（now 671周二晚6時30分直播）
韓職勁旅水原藍翼季初演出跌晒Watt，皆因要兼顧聯賽同亞冠盃雙線作戰，目前藍翼於韓職排包尾，亞冠盃則出線在望，足見頭車範根明顯將重心放於亞冠盃。去到分組賽最後一輪，藍翼只要贏波就出線，肯定唔會手軟！
事實上，藍翼近況低沉，惹來傳媒同球迷不滿，球隊谷埋一肚氣，好想大炒魚腩挽回信心。武裝部隊分組賽五戰失十六球，其中作客兩戰失九球，顯示其客場防守力極弱，今次就算有心死守亦頂唔到幾耐，捧「讓球主勝」！

同組FC上海（上海申花）主場對鹿島鹿角，上海想出線必須贏波，再望藍翼失分，雖然機會渺茫，但都會全力爭勝。況且內地抗日氣氛濃厚，上海主帥賈秀全講明會認真作戰。鹿角再添一分就能首名出線，和波收貨，作客讓波信唔過，捧「讓球主勝」！（周二晚8時開賽）