UFunFun 討論區 - Powered by Discuz! Board

標題: 好唔開心，好想喊。個仔又俾老師投訴~ [打印本頁]

作者: 黏貼膏 時間: 2009-2-9 09:51 標題: 好唔開心，好想喊。個仔又俾老師投訴~

我個仔今年二年班，佢一向都唔係嗰啲非常乖巧嘅小朋友，呢點我接受，但佢成績一向都係中上。但由升上二年班開始，我成日都收到班主任嘅電話，投訴佢曳。早幾個星期，老師打電話俾我話佢上堂唔專心，仲喺份測驗卷寫名嘅位置上寫「x吃屎」。我聽咗之後成個灰晒。點解我個仔係咁？佢平時好聽我話，我真係想像唔到佢會咁做。之後我鬧又鬧過，氹又氹過，每次我話佢，佢都喊晒口表示佢知錯，佢自己亦都會好唔開心。的確，我話完佢佢亦冇(至少我冇再收到同類投訴)再犯。
尋日我同佢默書，佢點錯好多字，咁我就叫佢每個錯字要改正十次，佢好唔開心，但亦唔敢反抗。佢改完後，竟然俾我發現佢用原子筆喺枱面寫咗幾個字(係默書嘅生字)。我好嬲，好大力咁打佢手板，打到佢喊。我真係好唔明，佢明知咁做我一定會發現又一定會鬧佢，點解佢仲要做？
到咗今朝一早，老師嘅電話又到，佢話我個仔上星期五喺學校除褲俾同學睇，今日有個女同學嘅爸爸投訴。老師問我個仔，我個仔話俾佢聽佢只係想俾佢前面個男同學睇。其實我已經教過佢好多次唔可以咁醜怪喺人哋面前除褲，就算去洗手間都要閂門。偏偏....
我真係覺得自己唔識得教佢，我威迫利誘軟硬兼施甚至恐嚇都出埋，佢都係咁。但佢又唔係頑劣到你鬧佢佢都唔理你嗰種....
我真係覺得好唔開心，覺得自己唔識教佢好似害咗佢咁，有時甚至有啲後悔生咗佢出嚟。
大家覺得我應該點做？

作者: sheshe 時間: 2009-2-9 11:21

聽你咁講, 你果個都好過我果個喎. 我果個成績好差. 而且係時常重覆犯錯. 你果個最少你教完或教訓完佢, 同一樣野佢唔會再犯. 最多都係教多幾次啫.

小朋友係好易從周圍既事情學習 (佢地學左未必識分好與壞), 所以留意下身邊有冇咩人教壞佢 (包括電視電腦媒體). 同埋最好係早d教佢什麼是對既東西, 比事後糾正佢錯既東西會容易得多.

而家d電視電影真係好多不雅用語, 要小心選擇, 小朋友睇完又會照樣跟住講.
小朋友既世界係無性別觀念, 比人睇佢可能覺得無咩所謂. 唔同民族對於接受身體既暴露程都各有不同, 呢方面真係無咩話對與錯.

作者: 一首歌 時間: 2009-2-9 13:07

樓主你有無搵學校社工幫忙？仲有仔仔班主任有無同你相量點樣可以幫下你仔仔？

作者: 幾乎 時間: 2009-2-9 13:29

你個仔係獨子?平時係學校有冇朋友?

睇情形你個仔有d 缺乏自信(係名字欄寫「x吃屎」), 想引人注意
上堂唔專心好多細路都會, 但以上情況同我過往的問題同學相似
經常做d 奇怪行為引人注意, 因為不能從正面渠道得到認同(e.g 學業成就)
此情況會令同學疏遠他, 令情況惡性循環

如果唔介意,其實可以帶佢見下心理醫生, 但千萬唔好有個觀念認為自己個仔心理有問題或者唔正常, 只係在問題未惡化之前得到專業意見去改善,我個表弟都有類似情況, 甚致比你個仔更嚴重,現在已得到改善

作者: 黏貼膏 時間: 2009-2-9 13:34

多謝你哋嘅意見。佢唔係獨子，不過妹妹只得歲幾。我己經盡量多啲注意佢，唔好令佢覺得妹妹出咗世冇人理佢。佢喺學校都多朋友，由我出席學校活動同幫佢開生日會所觀察，佢都好受朋友歡迎，但亦好受人影響，人哋曳佢又曳埋一份嗰隻。老師同我講話佢知道其他同學有啲都係曳，但人哋係曳得聰明啲，唔會做得咁明顯。
我好認同樓上GJ225所講，我個仔自細唔係咁明白男女嘅分別，冇乜絶對對與錯嘅觀念(都係我哋唔好)，所以佢好容易俾人影響。
我諗情況又未嚴重到要搵學校社工。我都同啲社工朋友傾過，佢哋覺得佢有可能係資優兒童，又或者係純粹想引人注意。但無論點都好，我都要做啲嘢......
我呢兩日會見到心理醫生，我會問吓佢意見，因為我真係開始唔係好明個仔諗乜。我唔係一個好媽媽。究竟我係咪需要辭咗份工俾多啲時間佢？
好多謝你哋俾我舒發，我個心舒服咗好多。

作者: 一首歌 時間: 2009-2-9 13:54

如果以我覺得辭咗份工俾多啲時間佢會好Ｄ，
仔仔讀二年級的確有媽咪係身邊會好Ｄ，可以多Ｄ親子溝通，
我有個朋友佢個女同樣讀二年級，但上堂成去左遊雲，
老師提意朋友學童檢查時問問醫生既意見！

作者: 啤酒桶 時間: 2009-2-9 16:16

我有個仔以前讀緊中學既時候，我先生收唔少警告信同電話，投訴打人、曠課…結果我先生到個仔畢業趕佢出去，俾佢睇世界艱難… 我諗個仔自費讀書會用功多0的…

作者: 半圓梳化 時間: 2009-2-9 16:40

你個仔做的咁極端行為...似乎係要人重視佢, 真係唔好看輕

作者: 多謝老細 時間: 2009-2-12 11:20

可憐天下父母心

作者: jj 時間: 2009-2-12 16:09

搵學校社工!!!!!!!!!!

作者: uc@ic@ 時間: 2009-2-12 22:31

可能佢唔中意個班主任.....

作者: Ms.kiki 時間: 2009-2-13 00:05

樓主, 加油呀 !! 比多些少耐心去慢慢教 !!

作者: k123456o 時間: 2009-2-13 00:24

你要帶你個仔去睇心理醫生。
你個仔未必係曳，好有可能佢覺得如果佢咁做先可以被你留意佢。
呢種性格最好就o係佢仲細過果時醫治。
其實未必係件壞事，因為可以o係時間仲早o既時候去改變佢。

作者: 黏貼膏 時間: 2009-2-13 17:09

多謝你。我之後都同個仔傾過，佢應該都係唔係好知道要避忌呢啲嘢，所以先咁做。我問過精神科醫生，佢話未必係我個仔有問題，佢可能只不過係頑皮。我亦問過臨床心理學家，佢建議我哋多啲同佢講吓故事，等佢從故事中學習正確嘅觀念。到現在為止，收效都唔錯。
我已經盡量關心佢多啲，唔好只係顧住個女。希望佢會有改善。
我都問過佢係咪唔鍾過返學，佢話係。但我同佢講返學係佢嘅責任，每個人都有自己要做嘅嘢，就好似爸爸同媽媽要返工咁。佢都好似好明白，但我就好肉赤。不過換個角度諗，適量嘅壓力會有助佢成長嘅，好過長期留喺溫室入面，到大個時就受唔起挫折。
好多謝你哋嘅支持同意見。

歡迎光臨 UFunFun 討論區 (http://www.ufunfun.com/)