UFunFun 討論區 - Powered by Discuz! Board

標題: 【終極受害者】 [打印本頁]

作者: 無價值 時間: 2009-2-22 01:21 標題: 【終極受害者】

前排聽到有個朋友爆出呢個形容詞，意思就係話一個人嘅一生就係不停愛人，俾人hurt，然後再愛人，再俾人hurt，我覺得我都係

我會好容易愛上一個人，而且係瞓身去愛，唔理後果，唔識點去保護自己

有好多人就算去游水，都會差只腳落去試下幾深先，再考慮要不要落去游，而我，就係插水式咁跳落去，無諗過d水會唔會深到浸死自己

咁瞓身去愛一個人，無錯，係會好甜蜜，因為一d小事、一個電話、一句說話都可以令我甜蜜好耐

但同時，亦都會因為一d小事、一個電話、一句說話令我好傷心

情人節嘅晚上，我好唔開心，搵咗個朋友出嚟陪我食宵夜，朋友鼓勵我主動打俾佢，打完之後發現原來係自己諗多咗，就即刻開心返曬，朋友話：“你心情成日都咁大起大落，好容易死咖，盡量用平常心對待啦。”

每個朋友同屋企人都話而家呢個男人一定會hurt得我好深，叫我一定要小心。但我一于少理，我依然傾盡100%嘅心對佢好

但有時原來對人太好都係一種錯，如果一個男人唔係好愛你，如果佢仲有d良心，你嘅好就係一種壓力，因為佢知道佢無能力去回報你，然後，佢就會縮沙

今晚，打佢電話關機，短信唔復，我一個女仔夜媽媽喺佢屋企樓下問保安：“我想問開車牌係XXXXX嘅男仔返咗嚟未？”，保安話唔清楚，我就行足兩層停車場搵佢部車，終于俾我搵到，喺樓下等咗幾個鐘，等佢開機睇到短信會落嚟搵我，最後，我等唔到，走咗

聽日，我會當無事發生，繼續同佢好似以前咁相處

P.S 要對情人節陪我嘅一個朋友講一句“THX”同一句“SORRY”，叫咗你出嚟宵夜，結果啱啱上菜，佢一個電話打嚟，我就一支箭咁標咗，凈低一個你同一臺嘅餸

   要對今晚生日嘅一個朋友講句“sorry”，當我一打佢電話關機，我蛋糕都未切，再次一支箭咁標咗

   要對今日陪咗我一個下午嘅朋友講句“sorry”，你哋教我唔好接佢電話，等起碼兩個鐘之後先打返過去，等佢緊張下我，結果我係俾你哋搶咗個電話先忍到無接，但係唔夠10分鐘就忍唔住打返過去

你哋可能會噴我，不過，我認我就係“終極受害者”

作者: 打工心態 時間: 2009-2-22 02:06

放男友既位置太重朋友既位置太輕如果我係你朋友我真係以後唔會搵你唔同你出街

一句 sorry 就夠 ?! 朋友就係用黎陪你同安慰你 ? 咁到底為朋友付出左d咩 ?

自己縮細自己既世界他日無朋友唔好問點解

作者: 無價值 時間: 2009-2-22 02:16

就憑一張post就界定我嘅為人，我覺得你亦都未免太主觀囖

我可以同你講我朋友好多，真心嘅朋友亦好多，點解你唔覺得奇怪，我咁睇重我男朋友，但我都仲可以有朋友喺身邊？

就係因為我平時夠義氣，佢哋有事我絕對係會挺身而出，無條件咁去幫佢哋

佢哋都好了解我，所以都會諒解我，幫我

作者: 賓賓蝦 時間: 2009-2-22 17:32

其實樓主，
一段單方面遷就既感情係唔會長遠架，
就咁聽你講我已經覺得，
你係果種男友話一就一，二就二既人黎啦。
我唔敢話你做得唔岩，
因為始終你係全心去付出。
但如果你真係想拍長拖，
你就要改變一下你依家呢種態度喇。
由其是你做咩走去人地屋企樓下四圍撲成個傻婆咁…
比你男友知道我林佢會覺得你好煩。
但係始終我唔知你男友係一個點既人，
所以我唔亂講野。
仲有，
2樓果位仁兄語氣雖然重左小小，
但佢係冇話錯你。
你如果重義氣，
就唔會兩度丟下你既朋友唔理，
證明係你心入面，
男友重要過朋友多多聲。
有時情人係重要，
但朋友都好重要架。
親人、朋友、情人，
應該係呢三種感情入面取一個平衝點。
最後，
我覺得你唔應該話自己係終極受害者囉。
根本好多野係你自己羅黎擔心者。
嘗試下唔好逼得自己男友咁緊要。

歡迎光臨 UFunFun 討論區 (http://www.ufunfun.com/)