我都有諗過想死, 不過後來開始無乜咁諗.
你仲記唔記得個過程? 我記得我以前好怕死, 見到細個手冊話比生銹野界到會破傷風死, 每次用界刀都驚驚地. 大少少見到親人病會好擔心佢地就咁就走.
不過當生活處處碰壁, 無法前進, 前路茫茫, 身體又唔健康, 感覺到死亡可能係一種解脫. 係果個時候我聽到有人成日話叫我睇下其他更慘既人, 就唔會想死. 當我果時好悲觀既時候, 我發現呢個咁既方法好似吸毒. 慘其實係無更唔更慘, 慘就係慘. 其他人既慘, 我只係睇到世界仲有得更黑暗, 我根本得唔到咩安慰. 我地食飯, 其他人唔飽; 相反. 可能比針桔親係一件小事, 但係痛緊既時候隔離有人開電視同你講: 你睇下人地咪仲慘. 我真係唔覺得咁樣可以心涼到唔痛.
我認為比針桔唔係走去同人比較, 你不如睇清楚枝針拔走枝針止痛好過. 當我發現由以前害怕死亡, 到後面感覺死亡可以係一種解脫, 我開始反思一樣野: 死都可以正面, 咁相對既生都應該可以正面. 自然之道, 出生入死, 生死不二. 個世界睇黎係一堆錯誤設計修補另一個錯誤設計, 但係會唔會係我既睇法錯左, 我用顛倒既眼光睇呢個世界? 心經云: 心無圭礙, 無圭礙故, 無有恐怖, 遠離顛倒夢想. 一般人視野維持係天地否, 天永遠係上面, 地永遠係下面, 貧者將會越貧, 富者將會越富; 而泰卦, 其實都係同一個世界, 不過處之泰然既人見到地天泰, 用相反既眼光睇呢個世界. 所謂泰山崩於前而色不變.
事情往往係相反, 危中就有機, 美好既事物背後反而暗藏殺機. 我舉個例: 我以前都以為一帆風順好, 不過後來我發現逆境既好處: 一個人一帆風順, 會以為能力來於自己; 當一個人遇到逆境, 你會驚覺世界並唔係想像中咁安全, 我地過馬路其實有機會比車車死, 同d車好近, 而宇宙大部份地方人都唔可能生存到. 我自己既見解係, 人既能力都係假借番黎, 腦與身, 都是假借回來既事物, 佛家稱這個我和我所都是苦, 空, 非我, 無常. 我發現神既無形之手每時每刻都工作, 呢個先係安身立命既地方. 當你係不斷既危機中發現一個個平凡而真實既神跡, 你將見到無處不在既神. 你發現成功與否唔在於有幾多人企係你果邊, 係神有無企係你果邊.
真理係: 天生我材必有用. 禍兮福之所倚, 福兮禍之所伏. 眾生平等是佛所說. 所謂做左正經野先, 咩野係正經野? 世間好多人講話咁先會發達, 咁先係有用, 佢同你咪又係人. 我反而見過無常世間一般人所判斷既有為與美好最後出現相反既結果.
真正既人生, 就係正經野. 係記載於正確既經典, 千百年來人類智慧既結晶. 並唔係近代人云亦云既複製人見解.
講番地天泰, 現代人比人鬧, 比人串視之為壞事, 可是佛家認為無中有謗, 飛來小災, 是大大的吉祥; 反而無功得美名, 是凶險的. 你打緊份工, 營營役役咪做緊好事囉. 就好似水善處人之所惡, 我以前踢波做龍門發現好好玩, 無人爭, 個個唔想做, 但係我又覺得好有意義. 我可能守得好差, 不過單刀黎到我點都係最後一個希望, 帶比隊友0.000000001%既盼望. 人如果要爬去高地靚位先可以得到快樂, 只不過依賴無常世間提供既剎那光輝. 如果你係可以爬到去, 其他人咪又係會到. 有形世間就係有上有落. 禪宗牧牛圖有講人得道後有美麗既家室無人睇到, 點解? 如果你可以發現一d大家唔享受既靚位, 就好似楊過訓到繩床而其他人訓唔到, 你不但發現你既獨特, 而且根本無人會爭你呢個 "靚位". 因為你係發動境隨心轉.
有人講過生命好似推左舊石上山再碌佢落去, 不斷重複. 看破既人發現呢個永恆既意義: 我只要做咁簡單既野, 就可以不斷超越, 無有窮盡, 自強不息.
可能講完無咩人明, 不過up下. (通常得我女朋友明)
