[討論] 點解相比基督新教，天主教徒傳福音咁無力？
照小弟的非正式觀察，原因如下：
1，因為佢地一日唔離教的話，基本上係團契用係好重要o既生活，大半世人o既社交圈都係係教會內建立，自然教友識教友，天主教唔興依d內聚力強大o既團契生活，好多人彌完撒就去飲茶，平時無咩事都唔會返聖堂，返聖堂都係各自修行，教友唔多識教友，見左幾年連名都唔知係常事，又無相關團體聚會，善會又唔係成日開會同做野，同o個種係教會內建立生活圈o既新教習慣唔同，我地d教友互動都係鬆鬆散散，又點會傳到教呢？
我去人地聖堂，聽下講座，都唔會有人理我咩姓咩名，我地d活動大到無邊無際（教區旗下咩咩中心,物物中心,修院，專題講座，隔離區聖堂.....），就係無咩小圈子活圈，咁樣有好有唔好，係帶新人返黎一個固定o既信仰生活上，唔夠新教有聚合力係事實。
２，基於以上原因，無一個常常open o既團契ready，你就算帶左人返黎，都無組織招呼佢，只會叫佢讀慕道班，但係同人地一堆堆坐低就好多分享同關心o既團體係好唔同，有人會認為feel唔到教會care佢，我地都有d教友係因為咁而走左去基督教。你睇下主日，過左中午，仲有幾多教友留係度？主日平均每聖堂開三台mass，每台點都幾百人上落，兩三台都唔少人啦，但係留底有小組聚會o既人，比例上係咪勁低呢？你每年retreat有幾多人去先，你地自己知o既，我地真係無ready隨時有new comer會點招呼佢，嚴格上，mass唔係招呼新朋友o既。
３，新教非常積極傳教，同信仰中有排它性都有一定程度關係，堅信屋企人拜神係唔arm，返咩咩教係異唔得救，死都要拉幾個入黎教堂同佈道會，只有咁樣信，至有強力推銷自己教會o既推力，反之天主教，對唔同信仰同文化都好尊重（仲好nice），向自己親人推銷信仰真係無咩積極性，反之我地仲會參觀下人地佛堂，去下五教聯合講座，或者同人地宗教比較一下異同。我地又唔會相信，因為亞嬸嬸拜神，耶穌會唔照佢，仲要落地獄。
不過，我覺得咁樣幾好，我欣賞依種信仰多d。其實教會當然知依種建立係絕對性o既信仰有佢一定程度o既推力，但係人數增加唔係教會使命，依個係天主教信念，我好欣賞依種自由，自主同冷靜o既作風，因此我不會選擇基督教。但真係係傳教而言，係有d蝕底。
３.基督教唔係由上至下建立，無聖統制，佢地係由下而上由教友自建立，獨立營運，咩咩聯會之間係無絕對o既上下從屬關係，信徒係支持一間會堂o既重要資源，唔夠信徒，間野真係會摺埋o既，特別係小型教會，因為佢地好多教會都係由平信徒建立，自定執事團（受薪或不受薪），然後執事比錢聘請牧師，又或者由牧師建立，成立執事，加入聯會，無論點都好，依筆建堂，租地方（置業），同薪水，水電煤，攪活動成本，都係信徒經營admin同教友捐募得來o既，有左依種無信徒教會真係會摺o既推力，當然更加須要傳教，增加信眾，什至十一奉獻支持。
反之，天主教係由傳教神父建立聖堂，教區派人黎主持同中央管理，梵諦岡教你道理，培育一個神父順風順水都要至少七年時間（基督教神學院多不勝數，唔做牧師都可以做傳道，幾年攪掂），仲要睇下有無聖召，聖堂入面事無大小都有人打點，信徒只係黎拜神，堂區議會又唔係必要，信友根本咩都唔使操勞，信徒依賴性強（有修女同神父傳教，仲有專做傳教o既傳教修會），少左一種與堂會存亡與共o既心態，又自然少左一種傳教o既迫切性。唔信，你試下去圍村攪個天主教小堂，要有神父開彌撒o個隻播，你估有無依回事？要點攪？攪幾耐？批唔批？你會發覺係impossible o既。最多比你開個基基團，仲要聖堂神父批o個隻。
不過咁，天主教有天主教特色，基督教有基督教特色，我唔想佢變成基督新教。
