唉..很保守的媽媽...

唔生性、無上進心、唔揾嘢做係最大問題!
日日對住你,口講愛你惜你,但係自己就游手好閒,咁即係點?都唔好講將來咁遠嘞,淨係同你出街嚟講,係咪要你畀晒錢,佢係咪諗住一路係咁落去?就算佢屋企大把錢,都只係一個二世祖,咁嘅人有用咩?況且佢都唔係有錢人啦係咪?
你依家廿歲,梗係戀愛大過天,但係乜嘢係愛呢?啱啱識無幾耐啫,你話佢對你好,點好法呢?如果佢真係對你好,就應該做啲令你安心嘅事,而唔係日日對住你,唔為前途打算!
姑勿論你哋有冇將來,但係佢咁嘅性格行為,如果你哋繼續交往,萬一感情更深,佢仍然係咁,你就更加泥足深陷,到時都唔知分唔分手好!
衰啲講句,你想要一個食軟飯嘅男朋友呀?
你話拍拖唔一定結婚,咁你係諗住玩玩下?將來嘅事無人知,但係拍拖乜唔係諗住有將來嘅咩?你連一開始就無諗,咁係咪純粹享受所謂嘅佢對你好?
梗係對你好啦,唔做嘢,日日有女朋友陪,又唔使支出,幾爽呀!
所謂「貧賤夫妻百事哀」,個男朋友有上進心,就算暫時失意都唔係問題,如果係死蛇爛鱔一條,真係執到都喊三聲啦!
你都唔算細啦!天真,幻想下就算嘞!